आइसीसी टी–२० विश्वकपको एशिया छनोटका लागि नेपाली टिमले तयारी सुरु गरेको छ । सिंगापुरमा जुलाई २२ देखि २८ सम्म हुने प्रतियोगिताका लागि नेपाली टिमले प्रशिक्षण सुरु गरेको हो । नयाँ प्रशिक्षक उमेश पटवालको प्रशिक्षणमा सुरु भएको क्याम्पको पहिलो दिन सामान्य फिल्डिङ र ब्याटिङ गरिएको थियो ।
प्रतियोगिता खेल्न सिंगापुर जानु अगाडी नेपाली टिमले मलेसियामा १० दिने क्याम्प राख्ने भएको छ । जसमा दुई वटा टी–२० खेल खेल्ने योजना बनाएको छ । पहिलो चरणमा टिममा २५ खेलाडीलाई प्रशिक्षणमा बोलाइएको छ । जसबाट करीव दुई साताको प्रशिक्षण र म्याच सिनारियो पछि टिमको छिनोफानो गरिनेछ ।
यो प्रतियोगिता नेपाली टिमका लागि मात्र नभई प्रशिक्षक उमेश पटवालका लागि पनि निकै महत्वपुर्ण रहेको छ । औपचारिक रुपमा नेपाली राष्ट्रिय टिमको प्रशिक्षकका रुपमा आएका पटवालले नेपाली खेलाडीको खेल्ने सैली परिवर्तन भन्दापनि उनीहरुका मानसिकता परिवर्तन गर्नमा बढि जोड दिने बताए । साथै उनले यो प्रतियोगिता आफ्नालागि मात्र नभइ टिमका लागि पनि महत्वपुर्ण हुने बताए ।
प्रतियोगिताको शिर्ष स्थानमा रहेर ग्लोबल क्वालिफायर्समा छनोट हुने लक्ष्यमा रहेको नेपालका लागि हरेक खेल जित्नैपर्ने हुन्छ । त्यसमा पनि नेपाली टिमका लागि सिंगापुरको मौसममा पनि भर पर्नुपर्ने हुन्छ । सिंगापुरको बाताबरणमा घुलमिल हुने टिमले १० दिन अगाडी नै मलेसियामा प्रशिक्षण गर्नेछ ।
यस्तै प्रशिक्षक पटवालले टिममा खेलाडी परिवर्तनका लागि अहिले नै भनिहाल्न नसकिने बताए । उनले केहि साताको प्रशिक्षणपछि मात्र टिम कस्तो हुने भन्ने एकिन हुने बताए । यस्तै प्रशिक्षक पारस खड्काले यो प्रतियोगितामा राम्रो क्रिकेट खेल्नुको विकल्प नभएको बताए ।
उनले नयाँ प्रशिक्षक आएर टिममा राम्रो माहोल बनेपनि अन्तिममा खेल्ने खेलाडीले नै भएकाले सबैले राम्रो खेल्नेमा विश्वस्त रहेको बताए । नेपाली टिमको क्याम्पमा यसपटक नन्दन यादवले पहिलो पटक स्थान बनाएका छन । यस्तै बलर जितेन्द्र मुखिया र राजु रिजालले कमब्याक गरेका छन ।
