६ असार । एकदिवशीय विश्वकप क्रिकेटमा श्रीलंका अहिलेसम्म अंकतालिकाको मध्यतिर झुण्डिरहेको छ । तर बाँकी खेलहरुमा जित हासिल नगर्ने हो भने त्यो अवस्था लामो समयसम्म रहँदैन । र, यस्तो अवस्थामा उसले आयोजक टोली इंग्ल्याण्डको सामना गर्दैछ ।
इंग्ल्याण्ड एकदिवशीय बरियताको शीर्ष स्थानमा छ । जारी विश्वकपको उपाधि दावेदारितामा सबैभन्दा अगाडि देखिएको इंग्ल्याण्डले शीर्ष चारभित्र आफूलाई सुरक्षित गर्ने अभियानमा धेरै सफलता हासिल गरिसकेको छ ।
यता श्रीलंका भने संघर्ष गरिरहेको छ । विश्वकपमा अहिलेसम्मका ५ खेलमा उसले एउटा मात्र जितेको छ । दुई खेल वर्षाले रद्ध भएको थियो । दुई खेलबाट पाएको एक एक अंकका कारण उसले मध्यतालिकामा स्थान पाएको हो ।
इंग्ल्याण्डका लागि यस खेलमा ज्यासन रोय हुने छैनन् । ह्याम्स्ट्रिङको चोटका कारण उनी वेष्ट इण्डिजबिरुद्ध पनि खेल्न सकेका थिएनन् ।
तर उनको अनुस्थितिले शक्तिशाली ब्याटिङ लाइन अप भएको इंग्ल्याण्डका लागि केहि फरक पर्ने छैन । उनको स्थानमा जेम्स भिन्स टिममा आएका छन् । आजको खेलमा जित हासिल गरे इंग्ल्याण्डले सम्भवतः विश्वकपको सेमिफाइनलमा स्थान बनाउनेछ ।
श्रीलंकाका लागि यो निकै कनि खेल हो । तर, प्रतियोगितामा केहि उत्कृष्ट प्रदर्शन गरी आफूलाई प्रमाणित गर्न उसका लागि अवसर पनि हो । श्रीलंकाली टोलीले अहिलेसम्म ब्याटिङमा सन्तोषजनक प्रदर्शन गरेको छ । तर बाँकी २ क्षेत्रमा भने उसको प्रदर्शन निकै कमजोर देखिएको छ । इंग्ल्याण्डबिरुद्ध उसले शतप्रतिशत प्रदर्शन गर्नु आवश्यक हुन्छ ।
लिड्समा शुक्रबार वर्षाको सम्भावना निकै कम छ । यही मैदानमा इंग्ल्याण्डले विश्वकपअघि पाकिस्तानबिरुद्धको सिरिजको अन्तिम खेल खेलेको थियो र ३५० भन्दा बढीको योगफल रक्षागर्ने क्रममा ५४ रनको जित हासिल गरेको थियो ।
