काठमाडौं, ९ असार । ब्राजिलमा जारी कोपा अमेरिका फुटबलमा अर्जेन्टिना क्वार्टरफाइनलमा प्रवेश गरेको छ । समूह बीबाट अर्जेन्टिना उप विजेता बन्दा कोलम्बिया विजेताको रुपमा क्वार्टरफाइनलमा प्रवेश गरेको हो ।
गएराति भएको खेलमा अर्जेन्टिनाले आमन्त्रित राष्ट्र कतारमाथि २–० को जित निकालेको थियो । पहिलो खेलमा कोलम्बियासँग पराजित भएको अर्जेन्टिना दोस्रो खेलमा पाराग्वेलाई बराबरीमा रोकेको थियो ।

कतारविरुद्धको अर्जेन्टिनका लौटारो जाभियर मार्टिनेजले चौथो मिनेटमै गोल गर्दै सुरुआती अग्रता दिलाएका थए । कतारका डिफेन्डरले आफ्नै पेनाल्टी क्षेत्रबाट क्लियर गर्न नसकेको बललाई नियन्त्रणमा लिँदै मार्टिनेजले गोल गर्न सफल भए । पहिलो हाफमा १ गोल गरेको अर्जेन्टिनाले दोस्रो हाफमा पनि एक गोल थपेको थियो ।
८२ औं मिनेटमा सर्जियो अगुएरोले पाउलो डिबालाको पासलाई सदुपयोग गर्दै टिमका लागि दोस्रो गोल गर्दै जित निश्चित गरे ।
समूहको अर्को खेलमा कोलोम्बियाले पाराग्वेलाई १–० ले हरायो ।
कोलोम्बियाको जितमा गुस्ताभो क्वेलारले एकमात्र गोल गरे । लगातार तेस्रो जित दर्ता गरेको कोलोम्बिया अंक तालिकाको शीर्ष स्थानमा रहयो ।