सिंगापुरमा जारी आइसीसी टी २० विश्वकपमा कुवेतलाई हराएपछि नेपालको शिर्ष स्थानको यात्रा के हुने भन्ने टुंगो एकपटक फेरी अन्तिम खेलमा लाग्ने भएको छ । भाग्य र मेहेनत दुबैलाई एक साथ बोकेर हिड्ने नेपाली टिमले सिंगापुरको भूमीमा कतार विरुद्धको खेल जितेको भए परिस्थिती अर्के हुने थियो ।
तर अब यस्तो भइदियो की सबै क्रिकेट समर्थकका लागि अन्तिम खेल के हुने हो, नेपाल अर्को चरणमा पुग्ला की नपुग्ला भन्ने कौतुहलहरु सुरु भइसकेका छन । नेपाली टिमका मुख्य सदस्य शरद भेषवाकरको भनाई मान्ने हो भने नेपाली टिमलाई यसको बानी परिसकेको छ ।
इतिहास हेर्ने हो भनेपनि नेपाली टिम सहज रुपमा कुनैपनि प्रतियोगिता जितेको छैन । जतिपनि ठुला प्रतियोगितामा सफलता हात पारेको छ, सानो सानो मार्जिनले र अन्तिम समयमा नै हात पारेको छ ।
नेपाली क्रिकेट टिमको भाग्य र अन्तिम खेलको प्रतिक्षाका खेलहरु
आइसीसी विश्व क्रिकेट लिग डिभिजन ३
नेपाली टिमको यो क्रम २०१३ मा बर्मुडामा भएको आइसीसी विश्व क्रिकेट लिग डिभिजन ३ बाट सुरु भएको थियो । मिराकल इन बर्मुडा उपनाम नै दिन मिल्ने सो प्रतियोगितामा नेपालले सुरुवाती दुई खेल हारेर बाँकि तीन खेल जितेको थियो । तर सुरुवाती दुई खेल हारेपछि उसको डिभिजन २ मा उक्लने अवसर अरु टिमको हातमा पुगेको थियो । आफुले खेल्ने तीन खेलमा भारी अन्तरको जित र अर्को टिम शिर्ष स्थानको अमेरीकालाई हराईदिनुपर्ने अवस्था थियो ।
भनिन्छ, भाग्यको अगाडी केहि पनि लाग्दैन, हुनपनि त्यहि भयो, नेपालले पछिल्ला तीन खेल जित्यो, तर नेपालको जित भन्दापनि बर्मुडा र अमेरीका विचको खेल टिमको भविष्य निर्धारण गर्ने थियो । सो खेल अमेरीकाले जितेको भए नेपाल प्रतियोगिताको शिर्ष दुईमा पुग्ने थिएन । तर बर्मुडाले अमेरीकालाई पाँच विकेटले हराउँदै नेपालको शिर्ष दुईमा पुर्याउने मद्धत गर्यो । सो बेलापनि नेपाली खेलाडीले सम्पुर्ण क्रिकेट प्रेमिलाई आश्चार्यमा पारेका थिए । बर्मुडालेपनि नेपाललाई चाहिने रन रेटमा अमेरीकालाई हराउन सफल भयो ।
२०१३ युएईमा भएको टी-२० विश्वकप छनोट
त्यसपछि नेपालको अर्को प्रतियोगिता हो २०१३ युएईमा भएको टी २० विश्वकप छनोट । सो प्रतियोगितामा पनि नेपाललाई समुह चरण पार गर्न भाग्यले नै साथ दियो भन्दा गलत नहोला । समुह बी मा रहेको नेपालले स्कटल्याण्डलाई एक रनको अन्तरका कारण रनरेटमा पछि पार्दै प्लेअफमा पुगेको थियो ।
नेपाल र स्कटल्याण्डको समान आठ आठ अंक भएपछि एक रन बढि नेपालको भएकाले उसले समुहको सुपर सिक्समा पुग्न सफल भयो । यदि सो बेला नेपालले एक रन कम र स्कटल्याण्डले एक रन बढि हानेको भए नेपालको यात्रा समुह चरणमा नै रोकिथ्यो । दुबै टिमले समान सात खेलमा चार जीत र तीन हार ब्यहोरेका थिए ।
रन रेटमा नेपालको स्कटल्याण्डको भन्दा एक रन बढि भएकाले शुन्य दशमलव ३८० थियो भने स्कटल्याण्डको शुन्य दशमलव ३७९ भएको थियो । यसलाई भन्छन भाग्यले साथ दिएको ।
सोहि प्रतियोगिताको प्लेअफमा पनि नेपालका लागि अर्को कठिनाई थियो । सो बेलापनि हकङकङलाई अन्तिममा हराउँदा नेपालको विश्वकप यात्रा सफल भएको थियो । यस्तै केन्या विरुद्धपनि अन्तिम समयमा जित हात पारेको थियो । जसका कारण नेपालले पहिलो पटक टी २० विश्वकप खेलेको थियो ।
नेपाललाई भाग्यको भर र अन्तिम समयमा जित्ने बाँनी यतिमा सिमित छैन, नामिवियामा २०१८ मा भएको आइसीसी विश्व क्रिकेट लिग डिभिजन २ मा पनि नेपालले अप्रत्यासित जितका साथ विश्वकप छनोटमा स्थान बनाउन सफल भएको थियो । प्रतियोगितामा ५ खेलमा चारमा जित निकालेको भएपनि नेपालका लागि क्यानडा विरुद्धको खेलले उसको यो प्रतियोगिताबाट माथि जाने की नजाने भन्ने निर्धारण गथ्र्यो । रन रेटमा तल रहेको नेपाललाई क्यानडा विरुद्धको खेल जित्नैपर्ने थियो ।
लिग चरणमा आफ्नो अन्तिम खेलमा नेपाललाई क्यानडा विरुद्ध जितको विकल्प थिएन । यस्तैमा क्यानडाले दिएको एक सय ९४ रनको लक्ष्य नेपालले एक विकेट बाँकि हुँदा पुरा गर्यो । हारको नजिक पुगेर पनि करण केसीको त्यो ऐतिहासिक पारीका कारण नेपाल डिभिजन वनमा उक्लिनुका साथै विश्वकप छनोटमा स्थान बनाउन सफल भयो ।
जिम्बावेमा २०१८ विश्वकप छनोट
त्यसपछि अर्को भाग्यको खेल नेपालको विश्वकप छनोटमा पनि रह्यो । जिम्बावेमा २०१८ मार्चमा भएको यो प्रतियोगितामा नेपालले समुह चरण पार गर्न सकेन । समुह चरणमा हङकङलाई मात्र हराउन सकेको नेपालले अरु तीन खेलमा हारको स्वाद चाख्नुपर्यो । समुह चरणमा चौथो स्थानमा रहेर सातौ स्थानका लागि प्लेअफ खेल्दा नेपालको लक्ष्य एकदिवसिय मान्यता हासिल गर्नु थियो ।
जसका लागि पपुवा न्युगिनी, हङकङ र नेपाल विच ठुलो प्रतिस्पर्धा थियो । यो समयमा पनि नेपालले पपुवा न्युगिनीलाई हराउनु पर्ने थियो, जुनसुकै हालतमा पनि यता नेदरल्याण्ड्सले हङकङलाई पराजित गर्नुपर्ने थियो । हुनपनि त्यस्तै भयो, नेपालले पुपुवा न्यूगिनीलाई ६ विकेटले हराउँदा हङकङ नेदरल्याण्डसँग ४४ रनले हार्न पुग्यो । जसका कारण रन रेटमा नेपालले हङकङ र पीएनजीलाई पछि पार्दै चार बर्षका लागि एकदिवसिय मान्यता हासिल गरेको थियो । यदि सो खेलमा हङकङले नेदरल्याण्ड्सलाई हराएको भए परिस्थिती उल्टो हुने थियो ।
यी तर भए नेपालले अन्तराष्ट्रिय स्तरमा उपलब्धि हासिल गर्दा भाग्यको साथ र अन्तिममा जित्ने बानीको कुरा । यी बाहेक पनि नेपाली क्रिकेट टिमले विश्व क्रिकेट लिग र एसीसी टी २० कपमा पनि धेरैपटक भाग्यको भर परेको छ ।
