२०७६ साउन १
सुदूरपश्चिम प्रदेशमा सवा १६ लाख जनताले सधैं पेटभरी खाना पाउन नसकेको तथ्यांकले देखाएको छ। प्रदेशको स्वास्थ्य सेवा प्रवद्र्धन रणनीतिमा १६ लाख २९ हजार २ सय बढि जनताले मात्रै पेटभरी खान नपाएको तथ्यांकमा उल्लेख गरेको छ।
जनगणना २०६८ का अनुसार सुदूरपश्चिम प्रदेशको जनसंख्या २६ लाख १५ हजार एक सय ४८ रहेकोमा त्यस्को मध्ये ६२ दशमलव ३ प्रतिशत अर्थात सवा १६ लाख जनतालाई वर्षभरिमा केही महिना भोकै वा आधा पेट खाएर जीवन धान्नु परेको हो।
सुदूरपश्चिम प्रदेशको कैलाली, कञ्चनपुर र डडेल्धुरामा खाद्यान्य उत्पादन आवश्यकता भन्दा बढि हुने गरेको छ भने बाँकी पहाडी छ जिल्लामा खाद्यान्न अपुग हुने गरेका कारण प्रदेशवासीले पेटभरी समेत खान नपाएका हुन्।
प्रदेशको भुमि, व्यवस्था कृषि तथा सहकारी मन्त्रालयका अनुसार प्रदेशमा आवश्यकता भन्दा बढि खाद्यान्न उत्पादन भए पनि उत्पादन भएका खाद्यान्यहरु प्रदेश बाहिर र भारततिर निर्यात हुने गरेकोले प्रदेशमा खाद्यान्न अभाव हुने गरेको छ। धेरैले स्थानीय उत्पादन उपभोग पनि नगर्ने समस्या रहेको छ। सुदूरपश्चिम प्रदेशमा भारतबाट प्रत्येक वर्ष १२ हजार पाँच सय चार मेट्रिक टन खाद्यान्न आयात हुने गरेको छ।
