पुजा शाही ठकुरी श्रावण २८ अछाम
अछाम प्रहरीले घरेलु तथा अवैध न्युन गुणस्तरको मदिरा नियन्त्रणको अभियानलाई थप तीव्र पारेको छ । मदिरा सेवनका कारण समाजमा विभिन्न हींसाका घटनाहरुमा वृद्धी हुनुका साथै विकृतीजन्य घटनाहरु बढेको भन्दै प्रहरीले गस्ती टोली मार्फत न्युन गुणस्तरको मदिरा नियन्त्रणको अभियान थालेको हो ।
अभियान कै क्रममा जिल्ला प्रहरी कार्यालय अछाम मातहत जिल्लाका विभिन्न ठाउँमा खटिएको प्रहरी गस्ती टोलीले स्थानीयका घर तथा पसलबाट बरामद गरेको घरेलु तथा अवैध न्युन गुणस्तरको मदिरा मंगलवार नष्ट गरीएको छ ।
जिल्लाको पंचदेवल विनायक नगरपालिका, साँफेबगर नगरपालिका र तुर्माखाँद गाउँपालिकाका विभिन्न वडामा खानतलास गरी बरामद गरीएको ३८ लिटर अवैध न्युन गुणस्तरको मदिरा र ४८ लिटर घरेलु मदिरा स्थानिय जनप्रतीनीधी र बुद्धीजिबीहरुको रोहवरमा मंगलवार नष्ट गरीएको जिल्ला प्रहरी कार्यालय अछामले जानकारी दीएको छ ।
सोमबार ईलाका प्रहरी कार्यालय विनायकबाट खटीएको प्रहरी गस्ती टोलीले नगरपालीकाको वडा नम्बर २ धामिगाउँबाट मात्रै ४३ लिटर घरेलु मदिरा बरामद गरेको थियो । सोमबार नै तुर्माखाँद गाउँपालिका वडा नम्बर ६ रानिवनबाट पनि प्रहरीले ५ लिटर घरेलु मदिरा र न्युन गुणस्तरको ८ लिटर मदिरा बरामद गरेको थियो ।
यस्तै प्रहरी चौकी साँफेबगरले बरामद गरेको न्युन गुणस्तरको १५ लिटर मदिरा र साँफेबगर नगरपालिका वडा नम्बर २ पिपलतोलीमा से.१ ज.४२५ नम्बरको जिपमा चेकजाँच गर्ने क्रममा फेला परेको १५ लिटर न्युन गुणस्तरको मदिरा पनि आजै नष्ट गरीएको प्रहरीले जनाएको छ ।
अछाम जिल्लामा लामो समयदेखी प्रहरीले अवैध मदिरा नियन्त्रणको प्रयास जारी राखेको छ । तर पनि लुकीछीपी घरेलु तथा न्युन गुणस्तरको मदिरा विक्री वितरणको क्रम भने रोकीएको छैन ।
