२०७६ भदौ ३, कैलाली
कैलालीमा विकास निर्माणका योजनामा ढिलासुस्ती गर्ने निर्माण व्यवसायी पछिल्लो सयम सन्तोषजनक रुपमा काम गरिरहेको दावी गरिएको छ। विकास निर्माणका कामलाई तिव्रता दिन गृह मन्त्रालयले परिपत्र र ताकेता गर्न थालेपछि काम सन्तोषजनक देखिएको दावी गरिएको हो।
आर्थिक वर्ष २०७४÷७५ मा ६० प्रतिशत मात्र प्रगती रहेको सडकपुर बौनिया झपही थापापुर सडक स्तरोन्नतीको योजनामा गत आर्थिक वर्षमा २०७५÷७६ मा झण्डै २९ प्रतिशत बढेर ८९ प्रतिशत प्रगती भएको जिल्ला प्रशासन कार्यालय कैलालीले जनाएको छ।
यस्तै ताकेता पछि आर्थिक वर्ष २०७४÷७५ मा ३५ प्रतिशत मात्र प्रगती रहेको साविकको मनुवा गाविसको गजवा नाला पुलको ६५ प्रतिशत काम सम्पन्न भएको जिल्ला प्रशासन कार्यालयका प्रशासकिय अधिकृत शिवराज जोशी जानकारी दिए।
जोशीले विगतमा निर्धारित समय समाप्त भईसकेको र न्युन प्रगती भएका नौँ वटा पूर्वाधारका योजनाको काम समेत गत आर्थिक वर्षमा सम्पन्न भईसकेका बताए। सरकारले काममा ढिलासुस्ती गर्ने निर्माण व्यवसायीलाई कारवाही गर्ने तथा ठेक्का सम्झौता नै खारेज गर्ने चेतावनी दिएपछि उनीहरुले कामलाई तिव्रता दिएको प्रशासनको भनाई छ।
कैलालीका प्रमुख जिल्ला अधिकारी गोविन्दराज बोहोराले संघिय सरकारको परिपत्र पछि जिल्लाका निर्माण व्यवसायीसँग सघन रुपमा छलफल गरिएको जनाए। उनले उक्त छलफलपछि पूर्वाधारका योजनामा उल्लेख्य प्रगती भएको बताए।
बोहोराले भने, ‘जिल्ला प्रशासन कार्यालयमा निर्माण व्यवसायीसँग भएको छलफलपछि सन्तोजनक उपलब्धी भएको छ, विगतमा ठप्प रहेका कतिपय योजनाको काम सम्पन्न भएको छ, कतिपय सम्पन्न हुने चरणमा रहेका छन्।’
अहिले कार्यान्वयनको चरणमा रहेका योजनामा समेत तिव्र रुपमा काम भईरहेको प्रमुख जिल्ला अधिकारी बोहोराले बताए। तर २०७१ सालदेखि निर्माण सुरु भएको धनगढीलाई कञ्चनपुरको रैकवार विचवा जोड्ने मोहना नदीमा बनिरहेको पुलको काम भने कछुवा गतिमै छ।
चन्द्र शेखर मल्ल निर्माण व्यवसायी रहेको उक्त योजनामा आर्थिक वर्ष २०७४÷७५ मा ५५ प्रतिशत काम सम्पन्न भएपनि गत आर्थिक वर्ष २०७५÷७६ मा पाँच प्रतिशत मात्र काम भएको जिल्ला प्रशासन कार्यालयले जनाएको छ।
