साउन ४, अछाम
चौरपाटी गाउँपालिकाले चाँलु आर्थिक वर्ष ०७६/७७ नीति तथा कार्यक्रममा कृषि तथा पशु पालनलाई मुख्य प्राथमिकता दिएको छ । एक वडा एक सहकारी एक वडा एक उत्पादनको कार्यक्रमलाई प्राथमिकता दिएको छ । बढ्दो बेरोजगारी तथा जिविकोपार्जनमा देखिएका समस्याहरुलाई मध्यनजर गर्दै खासगरी यूवाहरुलाई लक्षित गरि उनिहरुका ब्यवसायमूलक सीपको विकास गर्न
उद्यमशिलता विकास कार्यक्रम, सहकारीका माध्यमबाट सस्तो ब्याजदरमा ऋण प्रवाहरु गरि बिभिन्न आयमूलक क्रियाकलाप मार्फत जिविकोपार्जमा सहज पुरयाउने उद्देश्यले कृषि तथा पशुपालनलाई मुख्य प्राथमिकता दिएको गाउँपालिकाका अध्यक्ष हर्क साउदले जानकारी दिनुभयो ।
युवाहरुको बढ्दो बिदेश मोहलाई मध्यनजर गरी व्यवसायिक उद्यमी, कृर्षि तथा पशु अनुदानको कार्यक्रम लागु गरिने अध्यक्ष साउदको भनाई रहेको छ । यस्तै पोषण तथा खाद्य अधिकारको सुनिश्चितता गर्न एक घर एक घरवारी बगैचा नीतिलाई पनि मुख्य प्राथमिकता दिइएको छ ।
आर्थिक समृद्धिका लागि कृषिमा लगानी भन्ने नीति लिदै गाँउपालिकामा कृषि उत्पादन हुने सम्भाव्यताको अध्ययन गरी सोहि अनुसारका कार्यक्रमहरु गरिने छ । स्थानीय स्तरमा बिरुवाहरु उत्पादन गर्नका लागि आधुनिक प्रविधियुक्त हाईटेक फलफूल नर्सरी स्थापनामा जोड दिईने गाउँपालिका उपाध्यक्ष माया कुँवरको भनाई रहेको छ ।
प्रत्येक वडाहरुलाई पशु स्रोत केन्द्रको रुपमा विकास गरि उन्नत डालेघाँस तथा भुई घाँसको उत्पादनलाई बृद्धि गरी पशुपालन लागत घटाउने र पशु नश्ल सुधारका लागि उन्नत राँगो, साडे तथा बोका वितरण गर्नुका साथै कृतिम गर्भाधानमा सेवा प्रारम्भ उपाध्यक्ष कुँवरको भनाई रहेको छ ।
कृषि तथा पशु क्षेत्रको उत्पादनलाई बजारीकरण गर्नका लागि एक कृषि सहकारी मार्फत बजारीकरण गरिनुका साथै पशु बिमा तथा बाली बिमा कार्यक्रमलाई प्रचार प्रसार गरी प्रभावकारी उपयोग गर्ने वातावरण मिलाईने उपाध्यक्ष कुँवरको भनाई छ । कृषिमा आधारित उद्योगलाई उत्पादन तथा प्रसोधनका लागि निति बनाई अनुदानको व्यवस्थासँगै कृषि तथा पशु पन्छीजन्य प्राकृतिक तथा माहामरी रोगको नियन्त्रण गर्ने व्यवस्था गरिने गाउँपालिकाको भनाई रहेको छ ।
Radio Janapriya online bata
