टेकराज भण्डारी, जेठ २०, अछाम
हावाहुरीका कारण रुख ढले विद्युत लाईन अबरुद्ध भएपछि ३ दिनदेखि सुदूरपश्चिमका पहाडी जिल्लामा विद्युत सेवा पूर्ण रुपमा अबरुद्ध भएको विद्युत आज बाट सुचारुभएको छ । डडेलधुराको गन्यापधुरा गाउँपालिका क्षेत्रमा शनिवार दिउसो रुख ढलेपछि सुदरपश्चिमका पहाडी जिल्लामा विद्युत सेवा अवरुद्ध भएको थियो ।
३ दिनदेखि विद्युत सेवा अबरुद्ध भएपछि सुदरुपश्चिमका अछाम, डोटी, बझाङ, बैतडी तथा डडेलधुरा जिल्लाका उपभोक्तालाई निकै सास्ती भएको छ । “हावाले रुख भाँचेर विद्युत अवरुद्ध भएको रहेछ” नेपाल विद्युत प्राधिकरण अछाम वितरण केन्द्रका प्राविधिक भुवनेश्वरी मुडभरीले भन्नुभयो – “अहिले डडेलधुरामा तार जोड्ने काम भैसकेको र अछाम लगायत अन्य जिल्लामा विद्युत सुचारुको पहल भैरहेको छ ।”
विद्युत सेवा अवरुद्ध भएपछि अछाम जिल्लाका विभिन्न सेवाग्राहीलाई समस्या भएको छ । सोमबार बैंकको काम प्रायः ठप्प रहेको छ । विद्युत सेवा अबरुद्ध भएको र ईन्टरनेट समेत नभएका कारण आफ्नो कारोबार प्रभावित भएको र सेवाग्राहीलाई सेवा प्रवाह गर्न नसकिएको बैंकका प्रबन्धकहरुले जनाएका छन् ।
अछाम सदरमुकाम मंगलसैनमा बाणिज्य, कृषि विकास, जनता, ईन्भेष्टमेन्ट, महालक्ष्मी लगायतका बैंक संचालनमा रहेका छन् । यस्तै ईलेक्ट्रोनिक पसल समेत प्रभावित छन् । विद्युत नहुँदा सेवा दिन नसकिएको पसल संचालकले बताएका छन् भने सोलारबाट फोटो, फोटोकपी सेवा लिनेले दोब्बर रकम तिर्नुपरेको छ ।
५ रुपैंँमा फोटोकपी हुनेमा सोलारबाट १० रुपैँया लिने गरेको सेवाग्राहीको भनाई छ । विद्युत अबरुद्ध भएपछि सबैभन्दा बढी मार स्थानीय संचार माध्यमलाई परेको छ । विद्युत ३ दिनदेखि पूर्ण रुपमा अबरुद्ध भएको र बैकल्पिक माध्ययम नहुँदा आफ्नो सेवा नै बन्द गर्नुपरेको एफएम संचालकहरुले बताएका छन् । मोबाईल चार्ज गर्न समेत नसकेर एक आपसमा समस्या भएको एक स्थानीय चन्द्रिका बुढथापाले बताउनु भयो ।
