टेकराज भण्डारी, जेठ २३, जुपु, अछाम
स्वास्थ्य संस्थाबाट दिईने सेवाको प्रभावकारीताका लागि मंगलसैन नगरपालिकाका ७ वटा स्वास्थ्य चौकीमा सामाजिक परिक्षण कार्य सकिएको छ । मंगलसैन नगरपालिका स्वास्थ्य शाखाको सहयोग तथा सुदूर संचार समाज नेपालको सहजीकरणमा सामाजिक परिक्षण गरिएको हो ।
नगरका बस्ती, कालागाउँ, बान्नातोली, ओलिगाउँ, जनालीवण्डाली, कुन्तिबण्डाली र जुपु स्वास्थ्य चौकीको सामाजिक परिक्षण गरिएको छ । स्वास्थ्य चौकीको समग्र अवस्थाबारे सरोकारवालालाई जानकारी गराई आगामी दिनमा अझै प्रभावकारी सेवा प्रवाहका लागि सामाजिक परिक्षण गरिएको हो ।
आज मंगलसैन नगरपालिका वडा नम्बर ११ मा रहेको जुपु स्वास्थ्य चौकीको सामाजिक परिक्षणमा सरोकारवालाहरुले जुपु स्वास्थ्य चौकीलाई अझैँ नमूनायोग्य बनाउने प्रतिबद्धता जनाएका छन् । स्वास्थ्य व्यवस्थापन समिति अध्यक्ष तथा वडा अध्यक्ष डबल सिंह भण्डारी प्रमुख अतिथि रहनुभएको कार्यक्रममा वडा नम्बर १० का अध्यक्ष नेत्र बहादुर रावल प्रमुख अतिथि रहनु भएको थियो ।
प्रमुख अतिथि रावलले जुपु स्वास्थ्य चौकी जिल्लाकै नमूना स्वास्थ्य चौकीका रुपमा अघि बढीरहेको भन्दै आगामी दिनमा स्वाथ्य चौकीका लागि आवश्यक सबैकार्य गर्न आफुहरु तत्पर रहेको बताउनु भयो । खानेपानीको समस्या रहेको गुनासोमा उहाँले आगामी आर्थिक बर्षबाट यसको समाधानका लागि पहल गर्ने बताउनु भयो ।
कार्यक्रमका अध्यक्ष डबलसिंह भण्डारीले पनि प्रधानमन्त्री स्वरोजगार कार्यक्रम अन्तर्गत वडा नम्बर ११ मा स्वास्थ्य चौकीको खानेपानीका लागि योजना छनौट गरेको र आगामी आर्थिक बर्षको सुरुवातमा नै समस्या समाधान हुने प्रतिबद्धता जनाउनु भयो । साथै केही औषधि नगरपालिकाबाट प्राप्त नहुँदा सेवाग्राहीले नपाएको गुनासोमा निरन्तर औषधि आपूर्तिका लागि नगरपालिकामा आवाज उठाउने बताउनुु भयो ।
स्वास्थ्य चौकी ईन्चार्ज बिष्णु थापाले स्वास्थ्य चौकीको समग्र अवस्थाका बारेमा जानकारी गराउनु भएको थियो । आफ्नो कार्यक्षेत्रका सबै बालबालिका, गर्भवति महिला, लक्षित समुदायलाई खोप, गर्भपरिक्षण, स्वास्थ्य सेवा लगायतका काम पूर्ण रुपमा निरन्तर प्रदान भैरहेका भन्दै आगामी दिनमा पनि गुणस्तरीय स्वास्थ्य सेवा लागि आफ्नो टिम तत्पर रहेकोमा जोड दिनुभयो ।
करिब ८ प्रकारका औषधि बर्षभरी २० देखि ४० दिनसम्म शुन्य मौज्दाद रहेको भन्दै नगरपालिकाबाट निरन्तर औषधि आपूर्तिका लागि माग गरिरहेको बताउनु भयो । कार्यक्रममा मंगलासैनी आधारभूत विद्यालयका प्रधानाध्यापक टंक प्रसाद तिमिल्सैना, वडा सदस्य गणेश रावल, टोल विकास संस्थाका मिलन रावल,
आमा समूह, महिला स्वास्थ्य स्वयंसेविका, युवा, महिला लगायतले सुझाव तथा अनुभव राखेका थिए । आगामी आर्थिक बर्षका लागि कार्ययोजना समेत तयार गरिएको छ । सुदूरसंचार समाजका कृष्ण बहादुर बुढाले सहजीकरण गर्नुभएको कार्यक्रमको संचालन अहेब भरतराज जोशीले गर्नुभएको थियो ।
