अछाम : न्याय हेल्थ नेपालद्धारा संचालित बयालपाटा अस्पताल अछाममा स्वास्थ्य बिमा गरेका बिरामीलाई उपचारमा प्राथमिकता दिन सुरु गरिएको छ । स्वास्थ्य बिमा गरेका बिरामी अस्पतालमा आएमा नाम दर्ता देखी सबै किसिमका उपचारमा पहिला पालो दिन थालिएको हो ।
बयालपाटा अस्पतालका बरिष्ठ तथ्याकं तथा सुचना अधिकृत दिपक बिष्टका अनुसार स्वास्थ्य बिमा गरेका बिरामी आएमा नाम दर्ताको लाईनलाई छुट्टै बनाएर दर्ता प्रक्रिया छिटो गरी उपचारमा पनि छिटो र पहिला पालो दिने गरीएको हो ।
उहाँले स्वास्थ्य बिमा गरेका बिरामीले छिटो उपचार पाउन् भन्ने हेतुले नाम दर्ता, ओपिडीमा चेकजाँच, प्रयोगशाला सेवा, भिडियो एक्सर तथा एक्सरे लगायतका सबै प्रकारका सेवामा प्राथमिकता दिने गरेको बताउनुभयो । साथै उपचार गर्न आउदाँ स्वास्थ्य बिमा कार्ड बोकेर आउन पनि उहाँले आग्रह गर्नुभएको छ ।
बयालपाटा अस्पतलामा सबै किसिमको उपचार निशुल्क भएकाले उपचारमा पहिलो पालो दिएर बिमा गरेका सेवा ग्राहीलाई राहत दिन थालिएको र थप उपचारका लागि अन्यन्त्र जानुपर्ने अवस्था आउदाँ उक्त बिमा बाफत एक लाख सम्मको उपचार पाउन सक्ने बयालपाटा अस्पतालका मेडिकल निर्देशक डाक्टर बिकाश गौचनले बताउनुभयो ।
अछाममा हालसम्म जना २१ हजार ६ सय ८ जनाले स्वास्थ्य बिमा गरेका छन भने सुदूरपश्चिम प्रदेशमा स्वास्थ्य बिमा गर्नेको संख्या १ लाख ९१ हजार ८ सय ५३ पुगेको छ ।
यस प्रदेशका ७ जिल्लामा स्वास्थ्य बिमा लागु भईसकेको र डोटी र डडेल्धुरामा पनि आगामी आर्थिक बर्ष भित्रै लागु गर्ने योजना रहेको स्वास्थ्य बिमाका प्रदेश संयोजक जनक साँउदले बताउनु भयो ।
देशका बिभिन्न ४८ जिल्लामा स्वास्थ्य बिमा लागु भईसकेको छ भने सरकारले देशका सबै जिल्लामा आगामी स्वास्थ्य बिमा गर्ने लक्ष्य लिएको छ । सुरुमा स्वास्थ्य बिमा गरेकाले उपचार गराए बाफत ५० हजार सम्मको खर्च उपलब्ध गराउने गरिएकोमा हाल उक्त रकमलाई सरकारले दोब्बर अर्थात एक लाख पुर्याएको छ ।
बर्षको एक पटक २५ सय रुपयाँ बिमाकं शुल्क तिरेमा एक घरपरिवारका ५ जनाले एक बर्षको अवधिमा एक लाख सम्मको स्वास्थ्य उपचार पाउने प्रावधान सरकारले बनाएको छ ।
